HIMMAH

Wiwit lahire manungsa iku
ngrasa merdika emoh dibudak
madeg pribadi emoh dipangku
nduweni himmah emoh dipidak

Sinebut himmah ya cita-cita
himmah 'aliyah ta – cita luhur
pribadi agung luhur dicita
pribadi kunthet himmahe ngawur

Pikiran jothok senenge ngathok
pikiran luhur seneng nenandur
ben anak putu ora dha bosok
tanduran thukul budi sing luhur

Himmah 'aliyah prentule iman
himmah sing kerdhil kudhungan kendhil
mring cangkem karut nguja gegaman
jirihe nyempok thik sithik jondhil

Wali ndhasari himmah 'aliyah
lir nyebar pari ing saben tanah
Indonesia gung Islamiyah
ambalung sumsum mlebet ing manah

Himmah sing kerdhil pas kaya Cakil
gadhe agama ing pabrik Trangkil
Islam sing luhur di idak sikil
rumangsa enak ngrokoti kikil.

d e n i n g
A. ASYHARI HUSAIN saking P A T I (Jawa Tengah)